ຈຸດໝາຍປາຍທາງຍອດນິຍົມຕາມລະດູການ

ໜອງຂຽວ ແລະ ເມືອງງອຍເກົ່າ: ສົມບັດທາງທໍາມະຊາດຂອງພາກເໜືອປະເທດລາວ"

ຫຼວງພະບາງ

ຫນອງຂຽວເປັນໝູ່ບ້ານນ້ອຍໆ ທີ່ຕັ້ງຢູ່ຕາມແຄມແມ່ນໍ້າອູ ໃນແຂວງຫຼວງພະບາງ ລ້ອມຮອບໄປດ້ວຍພູຜາທີ່ສູງສົງ ແລະ ພືດປ່າທີ່ຂຽວສົດງົດງາມ ເມືອງນ້ອຍໆແຄມແມ່ນໍ້າແຫ່ງນີ້ເປັນສະຖານທີ່ຍອດນິຍົມຂອງນັກທ່ອງທ່ຽວທີ່ຕ້ອງການຫຼີກໜີຈາກຄວາມວຸ່ນວາຍ ແລະ ກັບຄືນໄປສູ່ທຳມະຊາດ.

ກິດຈະກຳທີ່ນິຍົມໃນຫນອງຂຽວໄດ້ແກ່:

ການຍ່າງປ່າໄປທີ່ຈຸດຊົມວິວຫນອງຂຽວ ເພື່ອເບິ່ງທິວທັດໂດຍລອບຂອງໝູ່ບ້ານ ແລະ ແມ່ນ້ຳທາງດ້ານລຸ່ມ.
ລ່ອງເຮືອ ຫຼື ພາຍເຮືອຄາຍັກໃນແມ່ນ້ໍາອູ
ຢ້ຽມຢາມບ້ານຊົນເຜົ່າໃກ້ໆ ເພື່ອຮຽນຮູ້ວັດທະນະທຳ ແລະ ວິຖີຊີວິດທ້ອງຖິ່ນ
ພັກຜ່ອນຕາມເຮືອນພັກ ຫຼື ໂຮມສະເຕແຄມແມ່ນ້ຳ ແລະຊົມວິວພະທິດຕົກທ່າມກາງພູເຂົາ

ຈາກຫນອງຂຽວ ນັກທ່ອງທ່ຽວຈໍານວນຫຼາຍໄດ້ເດີນທາງໄປຕໍ່ດ້ວຍເຮືອຫາງຍາວເພື່ອໄປຍັງເມືອງງອຍເກົ່າ ເຊິ່ງເປັນບ້ານນ້ອຍໆທີ່ມີສະເຫນ່ ແລະ ຫ່າງໄກ ເຊິ່ງຢູ່ຕົ້ນນ້ຳຂອງແມ່ນ້ຳອູ ດ້ວຍການທີ່ບໍ່ມີຖະໜົນເຂົ້າຮອດ ເມືອງງອຍເກົ່າເກົ່າຈຶ່ງເປັນສະຖານທີ ທີ່ງຽບສະຫງົບແລະ ສຳພັດກັບທຳມະຊາດຢ່າງແທ້ຈິງຫຼາຍຂຶ້ນ.

ເມື່ອມາຮອດເມືອງງອຍເກົ່າແລ້ວ ກິດຈະກຳທີ່ນິຍົມປະກອບມີ:

ຍ່າງປ່າຜ່ານນາເຂົ້າ ແລະ ຫ້ວຍນ້ຳນ້ອຍ ໄປຖ້ຳກ່າງ ເຊິ່ງເຄີຍເປັນສະຖານທີລົບໄພໃນຊ່ວງສົງຄາມ
ຢ້ຽມຊົມໝູ່ບ້ານໃກ້ຄຽງເຊັ່ນ: ບ້ານນາ,ບ້ານຫາດຊາວ ທີ່ຍັງຄົງຮັກສາວິຖີຊີວິດແບບດັ່ງເດີມໄວ້.
ພັກທີ່ໂຮມສະເຕທີ່ລຽບງ່າຍ ທີ່ມີວິວສວຍງາມຂອງແມ່ນ້ຳ ແລະ ພູເຂົາທີ່ອ້ອມຮອບ.
ພັກຜ່ອນແຄມແມ່ນ້ຳ ອ່ານໜັງສື ຫຼື ຈິບກາເຟ ພ້ອມດື່ມດ່ຳ ກັບບັນຍາກາດອັນງຽບສະຫງົບ.